Тензиите кај Ормускиот Теснец продолжуваат и покрај најавите за мировен договор

Американската војска соопшти дека соборила повеќе ирански беспилотни летала кои, според тврдењата на Вашингтон, биле лансирани кон трговски бродови што пловеле низ Ормускиот Теснец.

Централната команда на САД (CENTCOM) објави дека Иран испратил повеќе еднонасочни нападни дронови во обид да погоди комерцијални пловни објекти во еден од најважните светски поморски коридори.

„Американските сили ги соборија сите беспилотни летала во изминатите часови, додека сообраќајот низ теснецот се одвива непречено. Меѓународниот трговски коридор останува отворен“, соопшти CENTCOM.

— реклама —

Американската војска не објави дополнителни детали за операцијата.

Претходно оваа недела, американскиот претседател Доналд Трамп изјави дека американската војска учествува во заштита на нафтени танкери и комерцијални бродови кои минуваат низ Ормускиот Теснец, во рамки на, како што ја нарече, „тајна мисија“ чија цел е одржување на пловниот пат отворен.

— реклама —

Според податоците на Британската служба за поморски трговски операции (UKMTO), во моментов низ теснецот минуваат помалку од десет бродови дневно. Пред ескалацијата на конфликтот меѓу Иран, САД и Израел, низ Ормускиот Теснец дневно минувале околу 130 бродови.

Ормускиот Теснец е еден од најважните светски коридори за транспорт на нафта и природен гас и преку него се движи значителен дел од глобалните енергетски резерви.

Во исто време, Вашингтон и Техеран испратија сигнали дека се приближуваат до договор за ставање крај на конфликтот. Висок претставник на американската администрација изјави дека двете страни се согласиле околу рамковен документ и дека САД очекуваат иницијалниот договор да биде потпишан во наредните денови.

— реклама —

Иранскиот министер за надворешни работи Абас Арагчи изјави дека сè уште се можни измени во текстот, но оцени дека договорот покажува оти Иран излегол посилен од конфликтот.

„Иран е победник во војната со САД“, изјави Арагчи за државната телевизија.

Тој додаде дека Иран, во координација со Оман, ќе продолжи да има контрола врз сообраќајот низ Ормускиот Теснец.

„Нашиот меч секогаш ќе виси над Ормускиот Теснец“, порача шефот на иранската дипломатија.

Според информации од извори на двете страни, нацрт-договорот предвидува повторно отворање на Ормускиот Теснец за непречен сообраќај и укинување на американската блокада на иранските пристаништа.