Американската ТикТок инфлуенсерка Сара Гилсон (43) е убиена во својот дом во Овасо, сојузната држава Оклахома, откако нејзиниот сопруг Џеремаја „Шон“ Дафи (48) насилно влегол во куќата и пукал во неа, соопшти полицијата. По нападот, тој си го одзел животот.
Трагедијата се случила неколку недели откако Гилсон објавила видео на ТикТок, во кое, следејќи популарен тренд, го нарекла својот сопруг „иден поранешен сопруг“ и навела дека дознала оти е педофил. Во описот на видеото, кое собра повеќе од шест милиони прегледи, напишала: „Посакувам да се шегувам“.
Според американските медиуми, Дафи бил обвинет дека несоодветно допирал и бакнувал 15-годишна девојка од младински кошаркарски тим што го тренирал. Во судските документи се наведува дека наводно испраќал пораки до девојчето, ја повикувал во хотелска соба за време на турнир и ѝ нудел пари за да молчи. Сепак, тој не бил уапсен ниту формално обвинет за овие наводи.
Гилсон и претходно барала судска заштита од сопругот. Во јуни годинава добила забрана за приближување, со која на Дафи му било наредено да го напушти заедничкиот дом и да не ѝ се доближува на помалку од околу 90 метри. Забраната била продолжена и важела до крајот на август.
Неколку дена пред убиството, инфлуенсерката објавила уште две видеа на ТикТок, во кои алудирала на тешкиот период низ кој поминува. Во едното напишала дека женските пријателства „буквално спасуваат живот“, а во другото порачала: „Никогаш повеќе да не ме пронајде тоа, што и да беше“.
Полицијата соопшти дека Дафи ја прекршил судската забрана, насилно влегол во куќата на Гилсон, ја убил, а потоа извршил самоубиство. Истрагата за случајот е во тек.
