Велика Сабота е ден на тишина, исчекување и духовен трепет, последниот ден пред најголемиот христијански празник – Велигден, кога православните верници се подготвуваат за Христовото воскресение.
Овој ден, кој се наоѓа меѓу распнувањето на Велики петок и радоста на Воскресението, го симболизира преминот од смртта кон животот, од тагата кон надежта. Според христијанското учење, тоа е време кога Христовото тело е во гробот, а верниците се во молитва, молк и духовна подготовка.
Велика Сабота се смета за ден на покој, жалост и сеќавање, кога се оплакува страдањето и смртта на Исус Христос. Верниците се поклонуваат пред Плаштеницата во храмовите, која го симболизира положувањето на Христовото тело во гробот.
Во текот на денот, се прават и последните подготовки за вечерното празнување. Верниците традиционално одат во црква, носејќи црвени јајца, симбол на животот и воскресението.
Точно на полноќ, со биењето на камбаните и радосниот восклик „Христос воскресе“, започнува прославата на Велигден. Верниците трипати ја обиколуваат црквата, по што следи празничната литургија, причестување и традиционалното кршење со јајца.
Велигден се доживува како празник на љубовта, мирот и надежта, како симбол на победата на животот над смртта и доброто над злото, а верниците се поздравуваат со зборовите „Христос воскресе“ и „Вистина воскресе“.
