Европа продолжува да се соочува со еден од најекстремните топлотни бранови во својата понова историја, при што неподносливиот бран на високи температури се движи кон исток, кон Полска и Романија.
Германија и Италија во саботата се соочија со екстремни временски услови, бидејќи температурите урнаа рекорди, надминувајќи 40 степени. Данска ја забележа највисоката температура досега, според Данскиот метеоролошки институт.
„Со 36,6 Целзиусови степени северно од Оденсе, го имаме најтоплиот ден откако почнале мерењата во 1874 година“, објави Институтот на платформата Икс.
Словачка потврди дека ноќта меѓу четвртокот и петокот била најтоплата досега забележана, при што температурите не се спуштиле под 26,3 степени.
Велика Британија, Франција, Швајцарија и Германија забележаа рекордни јунски горештини, а се очекува временскиот систем да постави нови рекорди додека се движи кон Полска.
Во Обединетото Кралство, тинејџер, двајца мажи и една жена починале во саботата откако биле пронајдени додека пливале во отворени води. Заедно со еден смртен случај во петокот и уште еден во средата минатата недела, вкупниот број удавени за време на актуелниот топлотен бран достигна шест.
Најмалку 15 лица загинале во инциденти поврзани со вода за време на мајскиот топлотен бран во Велика Британија.
„Топлотниот бран ќе го достигне својот врв за време на викендот, со температури кои во некои делови на Германија значително ќе надминат 40 степени“, изјави Карстен Брант, метеоролог од веб-страницата за временска прогноза „Донерветер“.
Во петокот, во близина на градот Сарбрикен, во близина на француската граница, беше измерена рекордна температура за Германија од 41,3 степени Целзиусови, соопшти портпарол на германската национална метеоролошка служба, нагласувајќи дека мерењето сè уште е прелиминарно.
Агенцијата издаде предупредувања за екстремни горештини за речиси цела Германија во саботата, додека властите ги повикаа граѓаните да штедат вода.
Според прогнозите, низ земјата се очекуваат температури од околу 36 степени, а локално максималните вредности може да достигнат и до 42 степени.
Во Франција, десетици лица, млади и стари, ги загубија животите за време на топлотниот бран. Температурите над 40 степени го нарушија железничкиот сообраќај и производството на електрична енергија, доведоа до забрани за консумирање алкохол, прекин на наставата во училиштата и одложување на настани на отворено.
Италијанското Министерство за здравство издаде црвено предупредување за топлотниот бран во 18 италијански градови, меѓу кои Милано, Рим, Торино, Венеција, Џенова, Фиренца и Болоња, за сабота и недела, при што во некои области температурите се очекува да достигнат до 39 степени Целзиусови.
Од кабинетот на францускиот премиер соопштија дека, иако топлотниот бран постепено слабее, притисокот врз здравствениот систем ќе продолжи, а бројот на хоспитализации ќе остане висок уште неколку дена. Според официјални лица, бројот на пожари во Франција е зголемен во споредба со истиот период минатата година како последица на високите температури.
Некои јавни служби, соочени со можни оштетувања на инфраструктурата, како деформации на патиштата и железничките шини, се обидоа да го намалат интензитетот на сообраќајот.
Германскиот национален железнички оператор „Дојче Бан“ им овозможи на патниците бесплатно да ги откажат резервациите за патувања на долги релации до почетокот на следната недела.
Компанијата соопшти дека нејзината инфраструктура е под особено голем притисок поради изложеноста на сонце, како и поради дополнителниот ризик за сигнализацијата, пругите и надземните електрични водови, предизвикан од невремињата и шумските пожари.
