Топлотниот бран што ја зафати Европа предизвикува сериозни последици врз здравјето на населението, а болниците и службите за итна помош во повеќе земји бележат рекорден број интервенции, предупреди Европската канцеларија на Светската здравствена организација (СЗО).
Во Франција, бројот на повици до итната медицинска помош во одредени градови е зголемен за дури 50 проценти, додека во Лондон минатата недела бил регистриран најголемиот број повици за животозагрозувачки состојби во еден ден од постоењето на службата за итна помош. Шпанија веќе проценила повеќе од 300 дополнителни смртни случаи, поврзани со високите температури во само неколку дена, а Италија пријавила пет смртни случаи во период од 24 часа.
Од СЗО предупредуваат дека Европа се затоплува повеќе од двапати побрзо од глобалниот просек и дека топлотните бранови веќе не се ретки појави, туку повторливи кризи кои стануваат сè почести, посилни и подолготрајни.
„Секое лето за кое не сме подготвени го плаќаме со човечки животи“, предупредуваат од организацијата.
Според СЗО, навремените мерки како акциски планови за заштита од жештини, рани предупредувања, обезбедување разладени простории и редовна грижа за ранливите категории граѓани веќе спасуваат животи. Проценките покажуваат дека смртноста, поврзана со жештините во Европа во 2023 година, би била за околу 80 проценти поголема доколку не биле преземени вакви мерки.
Организацијата им препорачува на граѓаните да избегнуваат престој на сонце во најтоплиот дел од денот, да внесуваат доволно течности, да ги одржуваат домовите разладени и редовно да ги контактираат постарите членови на семејството и соседите.
СЗО за 6 јули најави итен состанок со претставници од европските земји, посветен на подготвеноста за идните топлотни бранови.
„Овој топлотен бран е генерална проба. Летата што доаѓаат ќе бидат уште потешки“, предупредуваат од Светската здравствена организација.
