Намалување на бројот на повеќе категории тешки кривични дела е регистрирано во првите осум месеци од 2026 година во споредба со истиот период лани, информираше министерот за внатрешни работи Панче Тошковски во гостувањето во централниот Дневник на Македонската радио-телевизија.
Тошковски говореше и за актуелната безбедносна состојба, како и за истрагата за убиството во Чаир. Тој информираше дека истрагата сè уште трае и дека се расчистуваат околностите поврзани со еден од двајцата осомничени, вклучително и прашањето зошто лицето било на слобода во моментот на извршување на делото.
Министерот посочи дека во оваа фаза не може да соопшти дополнителни детали, но очекува осомничените наскоро да бидат лишени од слобода. Потсети дека и во претходни случаи на најтешки кривични дела осомничените биле обезбедени и против нив биле преземени соодветни мерки.
Во однос на безбедноста на граѓаните, Тошковски нагласи дека состојбата треба да се оценува врз основа на конкретни податоци, статистика и споредби, а не само преку поединечни настани.
„Прашањето дали македонските граѓани се безбедни е легитимно. Слободно можам да кажам да, но сепак станува збор за едно комплексно прашање. Истото не би можеле да го толкуваме надвор од она што би требало да бидат бројки, статистика и реалност“, истакна Тошковски.
Според податоците што ги презентираше, од јануари до август годинава бројот на убиства е намален од 19 на 12, односно за околу 37 проценти. Бројот на регистрирани сторители се намалил од 26 на 13, а бројот на жртви од 20 на 12, што претставува намалување од околу 40 проценти.
Кај обидите за убиство е регистрирано намалување од приближно 65 проценти. Разбојништвата се намалени за околу 40 проценти, а тешките кражби за приближно 30 проценти во споредба со првите осум месеци од 2025 година.
„Слободно можам да оценам дека имаме намалување на бројот на кривични дела од овој тип на насилен криминалитет. Кога би говореле за разбојништва, имаме намалување за околу 40 проценти, а кога би говореле за тешки кражби, имаме намалување за околу 30 проценти“, посочи министерот.
Тошковски оцени дека показателите упатуваат на подобрување на безбедносната состојба во делот на насилниот и имотниот криминалитет, но посочи дека кај одредени категории кривични дела има пораст.
Меѓу нив е семејното насилство. Според неговата процена, зголемениот број регистрирани случаи е поврзан и со поголемата охрабреност на граѓаните да го пријавуваат овој вид насилство. Тој го истакна и променетиот пристап во постапувањето, при што во Скопје е обезбедена достапност на дежурен судија кој може веднаш да постапува по барањата на МВР.
Значителен пораст има и кај кривичното дело „безобѕирно управување со моторно возило“. Во првите осум месеци од годинава биле регистрирани околу 2.200 вакви кривични дела, што е приближно седум пати повеќе од истиот период лани.
Тошковски објасни дека зголемувањето е поврзано со измените на Кривичниот законик, но и со примената на системот „Безбеден град“, кој овозможува поефикасно откривање на ваквите дела.
„Го имаме ‘Безбеден град’, кој ни помага и тоа како во овој дел на детекција на кривичните дела, и заради тоа имаме драстично зголемување на бројот на кривични дела, седум пати повеќе од истиот период лани“, истакна Тошковски.
Министерот нагласи дека при оценувањето на движењето на криминалитетот, покрај статистичките показатели, треба да се земат предвид и промените во законската рамка, како и начинот на откривање и регистрирање на кривичните дела.
