Министерство за внатрешни работи и Фондација „Фросина Кулакова“ денеска потпишаа Меморандум за соработка со цел унапредување на безбедноста во сообраќајот, подигнување на јавната свест и зајакнување на превентивните механизми.
Меморандумот го потпишаа министерот за внатрешни работи Панче Тошковски и претставници на фондацијата формирана во чест на Фросина Кулакова, која трагично го загуби животот на пешачки премин на булеварот „Партизански одреди“.
Со договорената соработка се предвидуваат заеднички кампањи за поголема сообраќајна култура, поддршка за жртвите и нивните семејства, како и активности за подобрување на институционалното постапување.
„Ова претставува заедничка определба трагедиите да не се повторуваат, човечкиот живот да биде највисок приоритет, а институциите, заедно со граѓанскиот сектор, да создадат посилен и поефикасен систем на превенција, заштита и поддршка“, изјави Тошковски.
Тој нагласи дека Министерството продолжува со имплементација и надградба на системот Safe City, како и со нови превентивни политики насочени кон навремено препознавање на ризиците во сообраќајот.
Министерот се осврна и на неодамнешната трагична сообраќајна несреќа на скопската обиколница, посочувајќи дека таа уште еднаш ја потврдува потребата од поголема одговорност и почитување на сообраќајните правила.
Од МВР порачаа дека остануваат посветени на креирање ефикасни политики за заштита на сите учесници во сообраќајот и зачувување на човечкиот живот како највисока вредност.
