Министерот за внатрешни работи Панче Тошковски, при посетата на СВР Струмица, истакна дека регионот бележи историски најдобри резултати во безбедноста во сообраќајот и намалување на криминалот.
Како што соопшти МВР, Тошковски заедно со директорот на Бирото за јавна безбедност, Александар Јанев, одржал работна средба со раководството на СВР Струмица, на која биле разгледани безбедносната состојба, постигнатите резултати и идните приоритети.
Според презентираните податоци, во текот на 2025 година е регистрирано намалување на криминалот во сите области на работењето, при истовремено зголемување на откривачката функција. СВР Струмица остварила ефикасност од 67 проценти, додека вкупната реализација достигнала 88,4 проценти.
Од МВР посочуваат дека се забележани и историски најдобри показатели во последните 15 години во делот на безбедноста во сообраќајот, со значително намалување на сообраќајните незгоди и нивните тешки последици.
Тошковски нагласил дека овие резултати се доказ дека професионална и добро организирана полиција е гаранција за безбедноста на граѓаните и најавил дека Министерството ќе продолжи да инвестира во човечките ресурси, современа опрема и нови технологии.
Во рамки на посетата, Тошковски и Јанев се сретнале и со градоначалникот на Струмица, Петар Јанков. Тие извршиле увид на локацијата во Градскиот парк каде што е планирано поставување спомен-обележје во чест на загинатите пилоти од Хеликоптерската единица на МВР.
Од МВР најавуваат и продлабочување на соработката со Општина Струмица преку нови инвестиции во безбедносната инфраструктура, дигитални решенија и системи за превенција и сообраќајна безбедност.
