Тошковски: Македонската полиција доби 496 нови полициски службеници

Министерот за внатрешни работи Панче Тошковски денеска присуствуваше на свечената промоција на новата генерација полициски службеници 2025–2026 во Полициската академија во Идризово, при што Министерството за внатрешни работи доби 496 нови полициски службеници.

— реклама —

Во своето обраќање, Тошковски истакна дека полициската професија е животен избор што бара храброст, чесност, професионалност и човечност.

„Со денешната свечена заклетва не добивате само работно место, туку прифаќате голема одговорност и ја преземате честа да ја носите униформата, која граѓаните ја препознаваат како симбол на редот, законот и сигурноста“, порача министерот.

— реклама —

Тој нагласи дека Министерството продолжува со модернизација на полициските капацитети преку инвестиции во нови полициски станици, современа опрема, возен парк, дигитализација на услугите и нови безбедносни системи.

— реклама —

Тошковски оцени дека Македонија денес има најнизок криминалитет во последните 20 години, што, според него, е резултат на работата на полициските службеници, но и на реформите и професионализацијата во МВР.

Основната обука успешно ја завршиле 496 кандидати, од кои 364 за полиција од општа надлежност и сообраќај, 78 за гранична полиција и 54 за специјалните полициски единици. На свеченоста тие положија заклетва и официјално станаа дел од Министерството за внатрешни работи.

— реклама —

За најдобар полициски службеник од генерацијата 2025–2026 беше прогласен Јован Тасевски, кому му беше врачена плакета од министерот Тошковски.