Министерот за внатрешни работи Панче Тошковски изјави дека во овој момент не може да каже кога водата во Гостивар повторно ќе биде безбедна за употреба, нагласувајќи дека нема да шпекулира со рокови додека не завршат сите анализи.
„Не можам да кажам кога ќе имаме вода за соодветна употреба. Ниту сум ги лажел, ниту ќе ги лажам граѓаните. Кога ќе имам точна информација, тогаш ќе ја соопштам на јавноста“, изјави Тошковски.
Тој посочи дека експертски екипи веќе работат на терен и земаат мостри од повеќе локации, а резултатите од анализите ќе покажат кои мерки ќе треба да се преземат за нормализирање на состојбата.
Според првичните проценки на експертите, најверојатно ќе биде спроведено хиперхлорирање на водоводниот систем со цел цевководот да се доведе во исправна состојба. По оваа постапка ќе следуваат дополнителни анализи за да се утврди дали водата најпрво е безбедна за техничка употреба, а потоа и за пиење.
Тошковски нагласи дека граѓаните нема да бидат повикани да ја користат водата ниту за технички потреби ниту за пиење сè додека експертите, врз основа на лабораториските анализи, не потврдат дека таа е целосно безбедна.
Тој додаде дека јавноста ќе биде информирана веднаш штом ќе бидат познати резултатите од испитувањата и планот за целосно нормализирање на водоснабдувањето.
