Осумнаесетгодишна девојка загина во тешка сообраќајна несреќа што вчераутро се случила на автопатот А1 кај Јастребарско, Хрватска. Таа управувала автомобил „БМВ“, иако немала положено возачки испит.
Несреќата се случила околу 9 часот на делницата меѓу клучките Јастребарско и Доња Зденчина, во насока кон Загреб.
Според полицискиот извештај, 18-годишната девојка се движела по левата сообраќајна лента и не одржувала доволно растојание од возилото пред неа.
Во обид да избегне удар во автомобилот, таа свртела налево и со предниот дел од своето возило удрила во задниот дел од „Опел Астра“ со унгарски регистарски таблички. Со автомобилот управувал 56-годишен државјанин на Унгарија.
По судирот, „БМВ“-то излетало од коловозот на зелената површина, каде удрило во ограда и две дрвја, а потоа запрело. Младата возачка починала на местото на несреќата.
Нејзиното тело било пренесено во Заводот за судска медицина и криминалистика во Загреб. Поради увидот, јужната коловозна лента на автопатот А1 во насока кон Загреб била затворена за сообраќај од 13:58 до 14:14 часот.
