Најмалку 13 лица загинаа, а петмина се повредени во тешка сообраќајна несреќа на индонезискиот остров Јава, кога камионет со свадбени гости останал приклештен меѓу два товарни камиона.
Несреќата се случила вчера попладне на крајбрежниот пат во близина на селото Кијаран Кулон, во регионот Индрамају. Според полицијата, патниците се враќале дома откако присуствувале на свадбена прослава во соседното село Пареан.
Како што изјави началникот на локалната сообраќајна полиција, камионетот, во чиј отворен товарен простор се превезувале патниците, запрел за да се сврти и да продолжи во спротивна насока. Во тој момент во него удрил товарен камион кој се движел зад него.
Од силниот удар камионетот бил оттурнат во спротивната коловозна лента, каде што во него удрил уште еден камион. При судирот, повеќе од десет патници биле исфрлени на коловозот.
Петтемина преживеани се хоспитализирани со повреди што се движат од полесни до тешки.
Сообраќајните несреќи со смртни последици се честа појава во Индонезија, каде што преоптоварените возила, недоволните безбедносни мерки и непочитувањето на сообраќајните правила често доведуваат до вакви трагедии.
