Две лица загинаа, а најмалку две други се повредени во тешка несреќа што се случи денеска (вторник), кога мал авион се урна на автопат во близина на Бреша, северна Италија.
Според очевидци, авионот во еден момент нагло се завртел во воздух пред да удрил во земјата, по што се запалил, а остатоците се разлетале десетици метри околу местото на ударот.
Нeсреќата се случила помеѓу населените места Флеро и Азано Меја, на делот каде се сече со автопатот А4, еден од најпрометните во земјата. Авионот, долг околу 7 метри, полетал од Грањано Требијенсе и се движел кон север пред да се урне под неразјаснети околности.
Според италијанските медиуми, загинале пилотот и една жена, чиј идентитет сè уште не е официјално потврден. Телата биле целосно изгорени и пронајдени во остатоците од леталото.
Двајца мажи на возраст од 49 и 56 години, кои се нашле со автомобил во близина на местото на падот, се здобиле со повреди. Тие минувале низ облак од огнени остатоци, а поради брзината не успеале да избегнат делови од авионот.
Италијанските воздушни и безбедносни власти отворија истрага за да ги утврдат причините за несреќата. Првичните информации не укажуваат на техничка грешка, но не се исклучува ниту човечка. Поради сложеноста на случајот, истражувачите работат со поддршка на воздухопловни експерти.
Локалните власти изразија сочувство до семејствата на загинатите и најавија дека автопатот ќе биде целосно расчистен и безбеден за сообраќај во текот на денот. Сцената, како што велат очевидци, била „апсолутно шокантна“.
