На шест години затвор е осудена 28-годишната Кортни Гартшор, откако судот утврдил дека со продолжено изложување на силна топлина од фен за коса ја усмртила својата тримесечна ќерка Далија-Роуз.
Според доказите изнесени пред судот, Гартшор го користела фенот врз бебето до еден час, при што девојчето претрпело тешки повреди од топлина. Изгорениците опфатиле околу 18 отсто од телото, особено главата, вратот, горниот дел од телото и едната рака.
Вештаците на обвинителството оцениле дека најверојатната причина за смртта била хипертермија и топлотен удар, а не самите изгореници.
Судијата Сајмон Колинс случајот го опишал како исклучително вознемирувачки и истакнал дека станува збор за сериозно прекршување на најосновната родителска должност.
Иако судот утврдил дека Гартшор немала намера да ја повреди или убие ќерката, судијата оценил дека станува збор за највисок степен на небрежност, бидејќи, според него, морала да забележи дека бебето е во тешка состојба и трпи болки.
„Ова е трагично колку што е и ужасно. Остатокот од животот ќе мора да го поминете со сознанието дека сте одговорни за нејзината смрт“, ѝ рекол судијата.
Судијата дополнително навел дека не прифаќа оти Гартшор досега покажала искрено каење, бидејќи, и покрај едногласната пресуда на поротата, таа не ја прифаќа целосно својата вина.
Нејзиниот адвокат Мари Мекара пред судот посочил дека Гартшор има тешко детство, проблеми со менталното здравје, како и историја на предозирање и самоповредување. Сепак, тој тврдел дека до ноќта на смртта на бебето соодветно се грижела за својата ќерка.
Гартшор и понатаму тврди дека не се сеќава дека го користела фенот врз бебето. Нејзиниот адвокат признал дека нема разумно објаснување за нејзината постапка, но претпоставил дека можеби мислела дека на детето му е студено и несоодветно се обидела да го загрее со фенот.
На изрекувањето на пресудата, Гартшор се приклучила преку видеоврска. Облечена во темносина затворска униформа, плачела и била видно потресена.
