(Видео) Насилство во Шкотска: Запалено полициско возило, повреден болничар

Нереди и напади со пиротехнички средства ја одбележаа Ноќта на огновите во Шкотска. Во Глазгов беше запалено полициско возило, а еден болничар се здоби со полесни повреди. По инцидентот е уапсен еден маж.

Шкотската полиција и екипа на брзата помош во четвртокот вечерта се упатиле на интервенција по пријава за повреден маж, но на патот биле нападнати со пиротехнички средства. Во нападот полициското возило претрпело голема материјална штета, а еден член на медицинскиот тим бил полесно повреден. Истрагата за случајот е во тек, објави „Скај њуз“.

— реклама —

Нереди имало и во јужниот дел на Единбург, во населбата Оксгангс, каде што биле превртени и запалени контејнери за отпад. Поради пожарите, пожарникарите морале привремено да се повлечат, додека група млади луѓе блокирала улица. И таму полицајците биле гаѓани со пиротехнички средства, но нема пријавени повредени.

Инцидентите се случиле за време на „Операцијата Амберлајт“, координирана полициска акција за спречување нереди во пресрет на Ноќта на огновите. Во неа учествувале и полициски службеници од Англија и Велс, а шкотската полиција ја оценила како најголемо ангажирање полициски сили од минатогодишната посета на американскиот претседател Доналд Трамп.

— реклама —

— реклама —

Случувањата повторно ја отворија расправата за построга контрола на продажбата и употребата на пиротехнички средства. Активистите предупредуваат на нивната злоупотреба и штетното влијание на бучавата врз домашните миленици. Како пример го наведуваат случајот од 2021 година, кога 88-годишната Џозефин Смит починала од вдишување чад откако двајца тинејџери низ отворот за пошта на нејзината куќа вметнале запален огномет и предизвикале пожар.

Британската влада предложила повлекување од продажба на најгласните огномети преку намалување на дозволеното ниво на бучава за комерцијалните пиротехнички средства од 120 на 110 децибели. Надлежната служба за безбедност на производите и стандарди наведува дека одредени високоризични или особено вознемирувачки средства веќе се забранети за општа продажба и се достапни само за професионална употреба.

— реклама —

Сепак, властите сметаат дека целосната забрана за купување или користење огномет од страна на граѓаните би била непропорционална мерка.