Трагедијата во „Пулс“ остави подолготрајни траги: преживеани развивале здравствени проблеми месеци по трагедијата

Неколку месеци по трагедијата во дискотеката „Пулс“, дел од присутните на концертот на групата ДНК кои во првите денови не почувствувале никакви повреди почнале да пријавуваат сериозни здравствени последици, меѓу кои и потешкотии со дишењето. Ова денеска го соопшти кочанскиот обвинител Борче Јанев на рочиштето за катастрофалниот пожар во кој животот го загубија 63 лица, а над 200 беа повредени.

— реклама —

„Има случаи каде лица веднаш по пожарот немале никакви симптоми, но по неколку месеци развиле проблеми со дишењето и други здравствени тегоби“, изјави Јанев, оценувајќи дека ова дополнително го потврдува размерот на трагедијата и последиците од вдишаниот чад и токсичните материјали што го исполнувале клубот во критичната ноќ.

— реклама —

Во обвинителниот акт детално се наброени тешките повреди кај преживеаните и причините што довеле до смртта на 63-те млади луѓе. Дел од повредените се деца кои биле во објектот во моментот кога избувнал огнот.

— реклама —

За трагедијата обвинети се 35 лица, кои се товарат за тешки дела против општата сигурност, денеска повторно не се произнесоа дали се чувствуваат виновни. На следното рочиште ќе треба да кажат дали чувствуваат вина.

— реклама —

Судијката најави дека изјаснувањето за вина ќе се одржи на 2 декември, кога е закажано следното рочиште.