Потрагата на хрватскиот Јадран доби трагичен пресврт – пронајдено е телото на еден од исчезнатите Португалци, додека по уште едно лице продолжува потрагата.
Според хрватските медиуми, телото било пронајдено во морето, а околностите сè уште се утврдуваат. Претходно, во средата, во морето и на брегот на островот Крк беа пронајдени двајца португалски државјани – млада жена и маж.
Мажот бил пронајден околу три километри јужно од Врбник, додека 33-годишната жена била пронајдена во морето, каде што, според информациите, поминала околу десет часа. Таа била пренесена во Клиничкиот болнички центар во Риека со стабилни витални параметри.
Спасувачките служби и натаму трагаат по преостанатиот исчезнат Португалец. Во потрагата учествуваат бродови на Капетанијата на пристаништата и полицијата, како и воен авион и хеликоптер на хрватското Министерство за внатрешни работи.
Потрагата е проширена и кон Велебитскиот Канал и поширокото подрачје околу Крк.
Координаторот на спасувачката операција од Националната служба за усогласување на трагање и спасување на море, Мирко Рашиќ, изјави дека спасувачите сè уште веруваат дека исчезнатото лице може да биде живо.
„Веруваме дека лицата можат да бидат живи во овој момент затоа што морето е топло. Станува збор за помлади лица и тие сигурно можат да преживеат. Веруваме дека се живи и продолжуваме да трагаме“, изјави Рашиќ за ХРТ.
