Американскиот претседател Доналд Трамп јавно ја повика највисоката правосудна функционерка во земјата, државната обвинителка Пам Бонди, да отвори поагресивни истраги против неговите политички противници.
„Не можеме повеќе да одложуваме, тоа ни го уништува угледот и кредибилитетот“, напиша Трамп во објава на социјалните мрежи директно упатена до Бонди, пренесе BBC.
Трамп изрази незадоволство дека „ништо не се презема“ и побара истраги против поранешниот директор на ФБИ, Џејмс Коми, државната обвинителка на Њујорк, Летитија Џејмс, и демократскиот сенатор Адам Шиф, кој го водеше неговиот прв импичмент-процес.
„Прегледав над 30 изјави и објави кои во суштина велат: ‘истата приказна како и минатиот пат, само приказни, без акција. Што е со Коми, со Адам „Лукавиот“ Шиф, со Летитија??? Сите се виновни, а ништо не се презема’“, порача Трамп.
Тој додаде дека Бонди би можела „да остане запаметена како една од најдобрите државни обвинителки на сите времиња“.
Изјавите на Трамп предизвикаа остри реакции кај демократите. Лидерот на демократското малцинство во Сенатот, Чак Шумер, предупреди дека „ова е пат кон диктатура“.
„Министерството за правда отсекогаш било силна државна институција, без разлика кој бил на власт. Сега Трамп го претвора во инструмент за прогон на неговите непријатели – виновни или не“, изјави Шумер за CNN.
Повикот на Трамп доаѓа само ден по оставката на федералниот тужител Ерик Сиберт, кој претходно одбил да покрене постапка против обвинителката Летитија Џејмс за наводна хипотекарна измама. „Сиберт доби отказ, а случајот е ГОЛЕМ“, тврди Трамп.
„Њујорк тајмс“ објави дека истрагите не нашле доволно докази против Џејмс, која пак обвинувањата ги оцени како „неосновани и мотивирани од одмазда“.
Од 1970-тите наваму, Министерството за правда настојувало да биде независно од Белата куќа. Но, Трамп ја скрши оваа традиција уште во првиот мандат, кога го отпушти тогашниот главен обвинител Џеф Сешнс и подоцна се судри и со наследникот Вилијам Бар.
