Американскиот претседател Доналд Трамп соопшти дека именува нов вршител на должноста директор на Националната разузнавачка служба и упати повик до Конгресот итно да дејствува во врска со безбедносниот закон ФИСА, обвинувајќи ги демократите дека ја загрозуваат националната безбедност.
„Исто како што направија со финансирањето на границата, радикално левичарските демократи се обидуваат нашата национална безбедност да ја земат како заложник поради неповрзани прашања. Треба да престанат да си играат политика со безбедноста на нашата голема земја“, напиша Трамп на својата социјална мрежа „Трут Соушл“.
Трамп најави дека Вилијам Пулт од 19 јуни ќе ја преземе функцијата вршител на должноста директор на Националната разузнавачка служба (DNI), со задача да спроведе итна реорганизација и намалување на администрацијата, враќајќи дел од персоналот во нивните матични агенции.
„Во исто време, барам постојан кандидат за оваа функција, кој има искуство во областа на националната безбедност“, додаде американскиот претседател.
Во објавата Трамп го повика и Конгресот да го продолжи важењето на членот 702 од Законот за надзор на странските разузнавачки служби (ФИСА), кој, според него, истекува оваа недела.
„ФИСА 702 е исклучително важен за нашата војска и за безбедноста на американскиот народ, особено за време на Светското првенство и прославите по повод „Америка 250“. Доколку не се преземе ништо, овој важен закон ќе истече оваа недела“, рече Трамп.
Тој побара од Конгресот да усвои краткорочно продолжување на законот за да се обезбеди време за избор и потврда на постојан директор на Националната разузнавачка служба.
„Сакам да му се заблагодарам на директорот Пулт за неговото време и посветеност“, порача Трамп.
