Американскиот претседател Доналд Трамп изјави дека го предупредил израелскиот премиер Бенјамин Нетанјаху да не дозволи конфликтот со Иран да прерасне во целосна војна.
Во интервју за израелски медиум, Трамп рекол дека му порачал на Нетанјаху да биде внимателен, бидејќи Израел би можел да остане сам во евентуална поширока конфронтација со Иран.
Според неговите тврдења, тој побарал од израелскиот премиер да не изведува нови напади врз Иран како одговор на претходните ракетни напади. Разговорот, како што навел, завршил без конечен договор.
Трамп истакна дека подоцна бил информиран оти Израел сепак одлучил да изврши напад, но додаде дека успеал да го намали неговиот обем.
Американскиот претседател откри и дека неколку држави од регионот кои посредуваат меѓу Вашингтон и Техеран побарале од него да изврши притисок врз Израел за да се избегне натамошна ескалација и да продолжат дипломатските напори.
Тој тврди дека Иран преку посредници испратил порака дека нема намера повторно да го напаѓа Израел и побарал прекин на израелските напади.
Од друга страна, Нетанјаху порача дека Израел има целосно право на самоодбрана и дека ќе продолжи да ги носи безбедносните одлуки според сопствените интереси.
„Израел има право да се брани и ќе го користи тоа право секогаш кога ќе биде потребно“, изјави израелскиот премиер.
