Трамп ја предложи Кристи Мекормик за нова амбасадорка на САД во Македонија

Доналд Трамп ја предложи Кристи Мекормик за нова амбасадорка на САД во Македонија. Белата куќа ја објави нејзината номинација на 9 ноември, меѓу предлозите доставени до американскиот Сенат, што значи дека станува збор за кандидатура која допрва треба да помине низ постапката за потврдување.

Мекормик е правничка со долгогодишно искуство во изборната администрација, заштитата на избирачките права и владеењето на правото. Од декември 2014 до 9 јули 2026 година била членка на американската Комисија за изборна помош (EAC), каде што трипати ја извршувала и функцијата претседателка. Третиот едногодишен мандат на оваа позиција го започнала во февруари 2023 година.

— реклама —

За членка на Комисијата била предложена од поранешниот претседател Барак Обама, а Сенатот ја потврдил во декември 2014 година. Во текот на ангажманот учествувала во реорганизацијата на институцијата и во активности за подобрување на изборниот процес и пристапноста на гласањето.

— реклама —

Пред тоа, од 2006 година работела како виша адвокатка во Одделот за избирачки права при Министерството за правда на САД, каде што се занимавала со прекршувања на федералните изборни закони и случаи на дискриминација при остварувањето на избирачкото право.

Има и дипломатско искуство, откако во периодот од 2009 до 2010 година била ангажирана во Амбасадата на САД во Багдад како виша правна советничка и вршителка на должноста заменик-координатор за владеење на правото. Таму учествувала во надзорот на ирачките национални избори и во повторното пребројување на гласовите.

— реклама —

Претходно работела и во правосудните институции на сојузната држава Вирџинија, како помошничка на државниот јавен обвинител и правна соработничка во Апелацискиот суд. Била дел и од правни тимови во предмети пред Врховниот суд на САД.

— реклама —

Додипломските студии ги завршила на Универзитетот во Бафало, а дипломата по право ја стекнала со почести на Универзитетот „Џорџ Мејсон“.

Засега не се објавени информации кога Мекормик би можела да пристигне во Скопје, ниту кои би биле нејзините приоритети доколку номинацијата биде потврдена од Сенатот.