Американски судија оцени дека администрацијата на претседателот Доналд Трамп сè уште не понудила доволно докази за да ја означи компанијата за вештачка интелигенција Anthropic како ризик за синџирот на снабдување и да ѝ забрани на федералната влада да ја користи нејзината технологија.
За време на сослушувањето одржано во четвртокот, окружната судијка Рита Лин изразила сомнеж дека Министерството за одбрана ги поткрепило своите тврдења со доволно докази.
Спорот произлегува од застојот во преговорите за договор меѓу Anthropic и Пентагон. Од компанијата претходно соопштија дека не сакаат нивната вештачка интелигенција да се користи за масовен надзор на американските граѓани ниту за донесување одлуки за гаѓање цели и употреба на смртоносно оружје, оценувајќи дека технологијата сè уште не е доволно развиена за такви намени.
Министерството за одбрана возврати дека приватна компанија не треба да одлучува како војската ќе ја користи технологијата и наведе дека алатките би се применувале на законски начин.
Владата, исто така, тврдеше дека јавните критики на Anthropic кон Министерството за одбрана ја оправдуваат забраната. Судијката Лин оцени дека таквиот аргумент е „навистина загрижувачки“, предупредувајќи дека би можел да создаде преседан за одмазда кон федерални добавувачи што не се согласуваат со администрацијата.
Пентагон дополнително тврдеше дека Anthropic би можел да ги измени или оневозможи своите модели за вештачка интелигенција за време на воени операции. Судијката посочи дека не гледа докази што би ја потврдиле таквата можност.
Сослушувањето е дел од една од двете тужби што Anthropic ги поднесе против Министерството за одбрана во март, оспорувајќи ја забраната и означувањето на компанијата како ризик. Судијката сега одлучува дали привремената блокада на забраната, донесена во март, ќе стане трајна.
