Американскиот претседател Доналд Трамп изјави дека не би се противел кинеските автомобилски компании да отворат фабрики во САД и таму да ги произведуваат своите возила, под услов да вработуваат американски работници.
„Ако Кина сака да дојде и да отвори фабрика за да ги произведува своите автомобили тука, тоа би било во ред за мене. Јапонија го прави тоа, но тие ги вработуваат нашите луѓе. Важно е да ги вработат нашите луѓе“, рече Трамп во интервју за „Фокс њуз“.
Тој, сепак, нагласи дека не сака кинеските производители да ги произведуваат автомобилите во Мексико, а потоа да ги извезуваат во САД.
Изјавата доаѓа во пресрет на средбата на Трамп со кинескиот претседател Си Џинпинг, која треба да се одржи за две недели. Американската автомобилска индустрија, во меѓувреме, врши притисок врз администрацијата да не им дозволи на кинеските производители полесен пристап до американскиот пазар.
Демократската сенаторка Елиса Слоткин неодамна изјави дека постојат гласини оти Трамп би можел да дозволи продажба на кинески автомобили во САД како дел од поширок договор со Пекинг. Таа оцени дека таквиот потег би бил стратешка грешка.
Трамп ги отфрли овие тврдења како „целосно лажна гласина“ и рече дека досега ги блокирал кинеските возила на американскиот пазар.
Администрацијата на поранешниот претседател Џо Бајден на почетокот на 2025 година воведе правила со кои на кинеските производители им се ограничува продажбата и производството на патнички возила во САД. Вашингтон, исто така, применува царини од над 100 проценти за кинеските електрични возила.
Најголемите американски и странски производители на автомобили, обединети во Алијансата за автомобилски иновации, минатата недела побараа од Конгресот трајно да го забрани пристапот на кинеските возила до американскиот пазар. Меѓу компаниите што ги застапува оваа група се „Џенерал моторс“, „Форд“, „Тојота“, „Фолксваген“, „Хјундаи“, „Хонда“ и „Стелантис“.
