Трамп: „Куба е следна – ама правете се дека не го кажав тоа“

Американскиот претседател Доналд Трамп со нова контроверзна изјава ја отвори темата за Куба, директно алудирајќи дека островската држава би можела да биде следната цел на Вашингтон по воените операции во Венецуела и Иран.

Говорејќи на инвестициски форум во Мајами, Трамп ја пофали американската воена моќ и интервенциите во странство, а потоа изговори реченица која веднаш предизвика реакции.

— реклама —

„Изградив голема војска. Реков: ‘Никогаш нема да мора да ја користите.’ Но понекогаш мора да ја користите. И Куба е следна, патем. Но правете се дека тоа не го кажав. Правете се дека не сум,“ изјави Трамп.

— реклама —

Иако не даде конкретни детали што точно подразбира под оваа изјава, сигналите од неговата администрација укажуваат на засилен притисок врз Хавана. Во изминатиот период, Вашингтон започна разговори со делови од кубанското раководство, додека самиот Трамп повеќепати сугерираше дека не ја исклучува ниту воената опција.

Кубанскиот претседател Мигел Дијаз-Канел потврди дека се водат разговори со САД со цел да се избегне евентуален судир, во услови кога земјата се соочува со сериозна економска и енергетска криза.

— реклама —

Кризата дополнително се продлабочи откако Венецуела, по смената на власт во Каракас, ги прекина испораките на нафта кон Куба – ресурс од кој островот е суштински зависен за електрична енергија и транспорт.

— реклама —

Ова не е првпат Трамп да испраќа вакви пораки. Претходно во март, тој изјави дека Куба би можела да биде предмет на „пријателско преземање“, за потоа да додаде: „Можеби тоа нема да биде пријателско.“

Изјавата „Куба е следна“ доаѓа во контекст на поширока стратегија на Вашингтон во регионот, по интервенцијата во Венецуела и зголемените тензии со Иран, што дополнително ја засилува неизвесноста околу идните потези на САД на Карибите.