Текстот на Меморандумот за разбирање меѓу Соединетите Американски Држави и Иран ќе биде јавно објавен, најверојатно по формалната церемонија на потпишување планирана за петок, изјави американскиот претседател Доналд Трамп.
Одговарајќи на новинарско прашање за тоа кога јавноста ќе може да го види документот, поставено за време на билатералната средба со францускиот претседател Емануел Макрон, Трамп порача дека тоа ќе се случи многу скоро.
„Мислам дека тоа ќе биде многу брзо. Сакам да биде објавен затоа што станува збор за исклучително моќен документ“, изјави Трамп.
Тој додаде дека јавноста треба да има увид во содржината на договорот.
„Ова е многу моќен документ и сакам јавноста да го види. Така што, веројатно тоа ќе биде наскоро, би рекол некаде по петок“, рече американскиот претседател.
Претходно, пакистанскиот министер за надворешни работи потврди дека формалната церемонија на потпишување на меморандумот ќе се одржи во Женева, Швајцарија.
Во меѓувреме, Трамп престојува во Европа, каде што учествува на Самитот на Г7, додека вниманието на меѓународната јавност останува насочено кон договорот што треба да стави крај на повеќемесечниот конфликт меѓу Вашингтон и Техеран.
