Само неколку дена откако Блискиот Исток се најде на работ на нова ескалација, американскиот претседател Доналд Трамп тврди дека САД и Иран се блиску до постигнување мировен договор што би можел да стави крај на конфликтот.
Говорејќи на онлајн митинг во поддршка на кандидатот за Сенат, Бери Мур, Трамп изјави дека преговорите практично се завршени и дека Вашингтон ги добил сите клучни барања.
„Не знам дали слушнавте, но денес ја завршивме војната со Иран. Тие се согласија никогаш да немаат нуклеарно оружје, што беше наше клучно барање. Денес ги расчистивме сметките со Иран“, порача Трамп.
Тој нагласи дека договорот предвидува Иран ниту да развива, ниту да купува нуклеарно оружје, додавајќи дека тоа претставува голема дипломатска победа за САД. Според него, по потпишувањето на договорот, Ормускиот Теснец повторно ќе биде целосно отворен за пловидба, а церемонијата би можела да се одржи веќе викендов во Европа.
Сепак, од Техеран пристигнуваат значително повоздржани пораки. Портпаролот на иранското Министерство за надворешни работи, Есмаил Багаеи, изјави дека информациите за конечен договор се шпекулативни и дека „ништо сè уште не е финализирано“.
Тој потврди дека најголем дел од текстот на меморандумот е усогласен, но обвини дека Вашингтон во последната фаза поставува нови и прекумерни услови, нагласувајќи дека Иран нема да отстапи од своите „црвени линии“.
Овие изјави доаѓаат по период на сериозни тензии, кога регионот беше на работ на поширока ескалација. Според Трамп, токму интензивираните дипломатски напори придонеле двете страни денес да бидат поблиску од кога било до договор што би можел да донесе прекин на непријателствата и стабилизација на Блискиот Исток.
