Додека Блискиот Исток утрово повторно е зафатен од нов бран насилство по иранските одмазднички напади врз американски цели, се доведуваат во прашање оптимистичките најави на американскиот претседател Доналд Трамп дека договор меѓу Иран и Израел е на дофат.
Само пред неколку дена Трамп уверуваше дека Израел и Иран „завршиле со меѓусебните препукувања“ и дека САД се во завршна фаза на „многу добар договор“ кој ќе спречи Иран да дојде до нуклеарно оружје. Тој дури тврдеше дека Ормутскиот теснец наскоро повторно ќе биде целосно отворен и дека договор може да биде постигнат „за два или три дена“.
Но, развојот на настаните на теренот ја демантираше таа проценка. По уривањето на американски воен хеликоптер, Вашингтон изведе напади врз ирански позиции во близина на Ормутскиот теснец, а Техеран возврати со ракети и дронови, насочени кон американски бази во регионот.
Ова не е првпат Трамп да најавува брзо решение и непосреден мир, додека конфликтот продолжува да ескалира. Во изминатите месеци тој повеќепати тврдеше дека Иран е подготвен за договор и дека преговорите се практично завршени, иако на теренот нема трајно примирје ниту конкретни знаци за конечен договор.
Новата ескалација уште еднаш покажа колку е кревка безбедносната состојба на Блискиот Исток и колку брзо оптимистичките политички пораки можат да бидат засенети од реалноста на конфликтот.
