Американскиот претседател Доналд Трамп изјави дека израелскиот премиер Бенјамин Нетанјаху нема да биде уапсен за време на неговата посета на Соединетите Американски Држави, реагирајќи на неодамнешните изјави на градоначалникот на Њујорк, Зохран Мамдани.
Во објава на својата социјална мрежа „Трут соушал“, Трамп порача дека Нетанјаху „нема да биде уапсен, на никаков начин и во ниту една форма“, додека престојува во САД. Тој додаде дека израелскиот премиер се бори против Иран, изнесувајќи и обвинувања на сметка на иранските власти.
Изјавата на Трамп следува откако Мамдани во поткастот на „Њујорк тајмс“ рече дека правниот сектор на неговата администрација ја разгледува можноста за апсење на Нетанјаху доколку тој присуствува на Генералното собрание на Обединетите нации во септември.
„Верувам дека Нетанјаху треба да биде во Хаг. Тој е обвинет пред Меѓународниот кривичен суд за воени злосторства“, изјави Мамдани, додавајќи дека за правните можности сè уште се водат разговори.
Во 2024 година, Меѓународниот кривичен суд издаде налози за апсење на Бенјамин Нетанјаху и на поранешниот израелски министер за одбрана Јоав Галант поради наводни воени злосторства и злосторства против човештвото поврзани со војната во Газа.
