Американскиот претседател Доналд Трамп откри нови детали за договорот меѓу САД и Иран за време на разговор со новинарите на Самитот на Г7 во францускиот град Евијан-ле-Бен.
Трамп, во присуство на францускиот претседател Емануел Макрон, изјави дека стратешки важниот Ормуски теснец веќе е делумно отворен, а целосно ќе биде отворен во петок, кога официјално ќе биде потпишан Меморандумот за разбирање меѓу Вашингтон и Техеран.
Тој потврди и дека текстот на меморандумот ќе биде јавно објавен, најверојатно веднаш по официјалната церемонија на потпишување.
Американскиот претседател навести и дека нема лично да присуствува на потпишувањето во Швајцарија. Наместо него, во Женева ќе отпатува потпретседателот Џеј Ди Венс, кој ќе ја претставува американската администрација на церемонијата.
Изјавите на Трамп доаѓаат во пресрет на потпишувањето на документот што треба да означи нова фаза во односите меѓу САД и Иран и да придонесе за намалување на тензиите на Блискиот Исток.
