Трамп подготвува трговски удар против Шпанија, се разгледува ембарго на шпански производи

Администрацијата на американскиот претседател Доналд Трамп подготвува список со шпански производи што би можеле да бидат опфатени со можно трговско ембарго, поради спорот со Мадрид околу издвојувањето на средства за одбрана во рамките на НАТО, објави „Политико“.

Според американски претставник, Министерството за финансии, во координација со Канцеларијата на американскиот трговски претставник и Министерството за трговија, доби задача да подготви список на шпански производи кои би можеле да бидат предмет на ембарго во наредните денови.

— реклама —

Трамп јавно ја изнесе оваа намера за време на самитот на НАТО во Анкара, откако Шпанија одби да го поддржи планот на земјите-членки до 2035 година да издвојуваат пет проценти од бруто-домашниот производ за одбрана.

— реклама —

„Не разговарав со Шпанија. Шпанија е залуден труд. Повеќе не сакаме да работиме со Шпанија“, изјави Трамп, по што му нареди на министерот за финансии, Скот Бесент, да ги започне потребните активности.

Ова не е првпат американскиот претседател да се закани со вакви мерки. И претходно најавуваше прекин на трговската соработка со Мадрид, откако шпанската влада не дозволи користење на заедничките воени бази за напади врз Иран.

— реклама —

Експертите предупредуваат дека евентуалното ембарго би можело сериозно да го загрози трговскиот договор меѓу САД и Европската Унија, бидејќи Шпанија е членка на Унијата. Според нив, таков потег би можел да предизвика нова трговска криза меѓу Вашингтон и Брисел.

— реклама —

Во Европската комисија засега се надеваат дека заканите нема да се реализираат. Неименувани европски претставници изјавиле дека ова не е првпат Трамп да упати вакви пораки и дека се надеваат дека ќе остане само на реторика.

Според официјалните податоци, трговската размена меѓу САД и Шпанија минатата година изнесувала околу 47 милијарди долари.