Трамп повторно бара помилување за Нетанјаху, сега поради војната со Иран

Американскиот претседател Доналд Трамп во четвртокот повторно побара од израелскиот претседател да го помилува премиерот Бенјамин Нетанјаху, кој е обвинет за корупција, пренесува Ројтерс. Трамп порача дека Нетанјаху треба целосно да биде фокусиран на војната со Иран.

— реклама —

„Претседателот Херцог мора да го помилува Биби уште денес. Не сакам Биби да се занимава со ништо друго освен со војната со Иран... Херцог е срам... пет пати ми вети дека ќе го помилува Биби“, изјави Трамп во интервју за израелската телевизија Н12, користејќи го прекарот на Нетанјаху.

Од кабинетот на израелскиот претседател Исак Херцог одговорија дека додека Израел е во војна, нема да се занимаваат со прашањето за барањето за помилување на Нетанјаху. Херцог додаде дека длабоко го почитува придонесот на Трамп за безбедноста на Израел и неговиот став за Иран, но нагласи дека Израел е суверена држава која ја почитува владеењето на правото.

— реклама —

„Претседателот ќе го разгледа барањето во согласност со законот, интересите на државата и сопствената совест, без каков било внатрешен или надворешен притисок“, се наведува во соопштението од кабинетот на Херцог.

— реклама —

Нетанјаху е првиот израелски премиер кој за време на мандатот е обвинет за кривично дело. Тој ги негира обвиненијата за примање мито, измама и злоупотреба на довербата, кои беа подигнати во 2019 година. Трамп и претходно неколкупати го повика израелскиот претседател да го помилува Нетанјаху, кој официјално поднесе барање за помилување во ноември.

Херцог претходно ги оспори тврдењата на Трамп дека му ветил помилување. Повикот на Трамп доаѓа во време на зголемени тензии, откако САД и Израел во саботата започнаа заедничка кампања на бомбардирање на Иран.

— реклама —

Според израелскиот закон, претседателот има овластување да помилува осудени лица. Сепак, нема преседан за давање помилување додека судскиот процес сè уште трае, а правната процедура може да биде долготрајна.