Поразите на Трамп и Орбан го отвораат прашањето за иднината на суверенизмот во Европа

Политичките порази на Доналд Трамп во САД, проблемите на Русија во војната во Украина и падот на политичките сојузници на нивните идеи во Унгарија и Србија укажуваат на можен почеток на крајот на суверенизмот. Ова е оценката во анализата објавена во хрватскиот медиум „Индекс“, во која се отвора прашањето за иднината на овој политички правец и потребата од поинакви политички структури во Европа.

— реклама —

Авторот смета дека Трамп и Владимир Путин, како најистакнати претставници на суверенизмот, не ја разбрале длабоката поврзаност на современиот глобализиран свет. Според анализата, меѓусебната зависност на државите е толку голема што санкциите и ограничувањата наметнати врз другите често имаат последици и врз оние што ги воведуваат.

Како пример се наведува царинската политика на Трамп, која, според авторот, не ги постигнала посакуваните резултати, туку придонела за раст на цените и инфлацијата во САД. Тој ја оценува како една од причините за изборниот пораз на неговата политичка опција. Во анализата се критикува и идејата за реиндустријализација на САД во услови на ограничување на имиграцијата, како и антивакциналната политика, за која се тврди дека придонела за враќање на болести што претходно биле искоренети.

— реклама —

Сепак, авторот предупредува дека слабеењето на суверенистичките движења не значи дека нивните политички противници можат да останат без промени. Либералите во САД и Европа, според него, мора да понудат одговор на економскиот модел што го оценува како неправеден, но и на бирократизираноста на европските институции. Токму незадоволството од овие состојби, заедно со мигрантскиот бран по 2015 година, придонело за подемот на суверенистичките движења.

— реклама —

Како можен чекор напред се предлага создавање прекугранични политички партии со мрежи во повеќе европски држави. Како пример е посочена паневропската политичка платформа ВОЛТ (Volt Europa). Според авторот, досегашниот модел на соработка меѓу националните партии во Европскиот парламент сè потешко одговара на современите општествени и политички промени.

Во земјите од поранешна Југославија, ВОЛТ засега функционира во Хрватска, Словенија и Косово, додека во Србија е во почетна фаза. Анализата го посочува и студентското движење во Србија како пример за надминување на традиционалниот партиски модел, како во начинот на организирање, така и во комуникацијата.

— реклама —

Авторот смета дека претстојните парламентарни избори во Србија би можеле да донесат значителни промени на политичката сцена, па дури и појава на нови политички организации наместо досегашните партии. Во тој контекст, се отвора и можноста за создавање современа паневропска партија што би придонела за надминување на долгогодишните тензии и градење подобри односи меѓу Србија, Косово, Босна и Херцеговина и Хрватска.