Повеќе од 400 дрвја веќе биле исечени: Судот го запре планот на Трамп за реконструкција на голф-терен во Вашингтон

Планот на американскиот претседател Доналд Трамп за целосна реконструкција на градски голф-терен во Вашингтон е привремено запрен со судска одлука. Сојузната судијка Ана С. Рејес издаде привремена забрана со која наложи теренот „Ист Потомак голф линкс“ да остане отворен, иако администрацијата најавила негово затворање на 15 ноември за почеток на градежните работи.

Според судијката, обидот на администрацијата да го претвори теренот во луксузно голф-игралиште, според желбите на Трамп, најверојатно ги прекршува законите за заштита на животната средина. Таа оценила дека затворањето на историскиот парк би предизвикало непоправлива штета за граѓаните и активистите кои се противат на проектот.

— реклама —

Судијката ги отфрлила и аргументите на Министерството за правда дека затворањето е неопходно од безбедносни причини, оценувајќи ги како изговор. Од Министерството, пак, порачаа дека ќе продолжат да ја бранат агендата на администрацијата на Трамп пред судовите, додавајќи дека одлуката не го спречува понатамошното планирање на проектот.

— реклама —

Спорот трае со месеци, а Трамп претходно јавно го претстави планот за преземање и проширување на теренот. Во обиколката на локацијата учествувале и министерот за внатрешни работи Даг Бургум и познатиот дизајнер на голф-терени Том Фацио. Претседателот првично најавил дека работите ќе започнат на 1 септември, по што беше поднесена тужба од голфери и активисти за зачувување на културното наследство.

Трамп во саботата повторно го промовираше проектот, критикувајќи ја судијката на социјалните мрежи и тврдејќи дека теренот е во лоша состојба и дека патеките се премногу блиску една до друга.

— реклама —

Несогласувањата дополнително се продлабочија во октомври, кога судијката Рејес забранила сечење дрвја и вовела строги услови за најавување на градежните активности, откако на локацијата биле исечени повеќе од 400 дрвја со минимално претходно известување.

— реклама —

Судската одлука се темели на пропустот на Службата за национални паркови да ги спроведе задолжителните законски постапки, меѓу кои и информирање на јавноста и собирање мислења од граѓаните за планираните промени. Судијката нагласила дека желбата на администрацијата да го затвори паркот до 15 ноември не може да биде причина за заобиколување на јавната расправа.

Иако спорот околу голф-теренот е само еден од правните предизвици со кои се соочува администрацијата на Трамп, тој е дел од пошироките судски несогласувања околу претседателските планови за промена на изгледот на Вашингтон. Меѓу другите проекти што се предмет на спорови се преименувањето на Центарот „Кенеди“, изградбата на триумфална порта покрај реката Потомак и подигнувањето свечена сала.