Трамп размислува за ублажување на санкциите врз рускиот инвестициски фонд

САД и Русија разговараат за можно укинување на американските санкции за Рускиот фонд за директни инвестиции (РФДИ), еден од најважните државни инвестициски фондови во Русија. Информацијата ја потврди Јуриј Ушаков, советник на рускиот претседател Владимир Путин за надворешна политика.

Ушаков изјави дека разговорите со администрацијата на американскиот претседател Доналд Трамп траат подолго време, а во нив активно учествува и Кирил Дмитриев, раководител на фондот и специјален пратеник на Путин. Тој нагласи дека сè уште не е познато каков ќе биде исходот од преговорите.

— реклама —

Претходно, „Њујорк тајмс“ објави дека администрацијата на Трамп разгледува можност за укинување на санкциите, а американското Министерство за финансии го разгледува барањето на фондот да биде отстранет од списокот на санкционирани субјекти. Конечна одлука сè уште нема.

— реклама —

САД воведоа санкции за фондот кон крајот на февруари 2022 година, неколку дена по почетокот на руската инвазија врз Украина. Фондот беше основан во 2011 година со цел привлекување странски инвестиции во руската економија, а американските власти го оценуваа како инструмент преку кој Кремљ го зајакнува своето економско и политичко влијание.

Според пишувањето на „Њујорк тајмс“, Русија бара укинување на санкциите и поради улогата на фондот во организирањето испораки на руски дизел во САД. Трамп на почетокот на октомври привремено ги ублажи ограничувањата за трговијата со руски дизел, образложувајќи дека целта е намалување на цените на горивата, кои пораснале поради војната со Иран.

— реклама —

Рускиот вицепремиер Александар Новак во вторникот изјави дека четвртиот танкер со руски дизел треба да тргне кон САД во среда. Во меѓувреме, Трамп со извршна наредба се откажа и од примената на дел од новите санкции и царини против Русија, предвидени со законот познат како „Греамов закон“.

Евентуалното укинување на санкциите би му овозможило на рускиот фонд полесно да соработува со американски финансиски институции и партнери, во зависност од обемот на олеснувањата. Таквата одлука би претставувала дополнителен чекор кон ублажување на економскиот притисок врз Москва, додека Русија продолжува со војната во Украина.

Засега не е познато дали администрацијата на Трамп ќе го прифати руското барање, ниту под кои услови би можеле да бидат укинати санкциите.