Трамп се врати со стариот претседателски авион, иако во Турција пристигна со новиот

Американскиот претседател Доналд Трамп го напушти Самитот на НАТО во Анкара со стариот претседателски авион „Ер Форс Уан“, наместо со новиот „Боинг 747-8“, кој му беше дониран од Катар, што отвори прашања дали новата леталица ги поседува сите потребни безбедносни системи.

— реклама —

Според извори на „Њујорк тајмс“, одлуката била донесена по препорака на американската Тајна служба, како мерка на претпазливост поради обновените тензии меѓу САД и Иран. Истите извори наведуваат дека не станувало збор за конкретна закана, туку за превентивна безбедносна мерка.

Во изминатиот период, дел од американските конгресмени и безбедносни експерти изразија сомнежи дали новиот авион е целосно опремен со напредните системи за заштита што ги има сегашниот претседателски авион, вклучувајќи технологии за одбрана од ракетни напади.

— реклама —

Од Белата куќа тврдат дека новиот авион е опремен со најсовремени безбедносни протоколи, но извори запознаени со проектот посочуваат дека не ги поседува сите способности на стариот „Ер Форс Уан“.

— реклама —

Трамп во понеделникот пристигна во Анкара со новиот авион и изјави дека бил воодушевен од неговиот луксуз. По завршувањето на Самитот, сепак, за враќањето во САД го избра стариот авион.

Американскиот претседател ги негираше тврдењата дека промената била од безбедносни причини. Според него, новиот авион порано полетал за да ги посети американските воени бази во Европа и да им биде претставен на американските војници.

— реклама —

Сепак, за време на престојот во Анкара, Трамп неколкупати изјави дека е „цел број еден“ на Иран и дека добил информации за можни цели на Техеран, што дополнително ги поттикна шпекулациите дека безбедноста одиграла важна улога во одлуката да се врати со стариот „Ер Форс Уан“.