Американскиот претседател Доналд Трамп најави покренување трговска истрага против Европската Унија и се закани со воведување нови царини, откако Европската комисија го казни „Гугл“ со вкупно 890 милиони евра поради прекршување на европските правила за дигиталните пазари.
Трамп реагираше на одлуката на Европската комисија, според која „Гугл“ им давал предност на сопствените услуги во резултатите од пребарувањето и ги ограничувал развивачите на апликации да ги насочуваат корисниците на „Гугл плеј“ кон други, поевтини начини на купување.
„Европската Унија повторно тргна директно против големите американски компании“, напиша Трамп на својата социјална мрежа Truth Social.
Тој потсети дека ЕУ претходно ги казнила и „Епл“, „Мета“, „Амазон“ и други американски компании, тврдејќи дека „Гугл“ досега платил повеќе од 18 милијарди долари казни.
„Оваа незаконска и крајно дискриминаторска практика нема да продолжи за време на администрацијата на Трамп. Соединетите Американски Држави не се европска касичка-прасичка, ниту ќе дозволиме тоа да станат“, порача американскиот претседател.
Трамп најави дека неговата администрација веднаш ќе покрене истрага според членот 301 од американскиот Закон за трговија, кој им овозможува на американските власти да ги испитаат мерките на странски држави што Вашингтон ги смета за неоправдани, дискриминаторски или штетни за американската трговија.
По завршувањето на истрагата, САД може да побараат укинување на спорните мерки, да започнат преговори или да воведат трговски противмерки, вклучително и дополнителни царини.
Европската комисија соопшти дека казната за „Гугл“ се состои од 460 милиони евра поради фаворизирање на сопствените услуги во интернет-пребарувањето и уште 430 милиони евра поради ограничувања на развивачите на апликации на платформата „Гугл плеј“. Компанијата има рок од 60 дена да предложи мерки за усогласување со европските правила.
Новата закана дополнително ги заострува односите меѓу Вашингтон и Брисел, кои подолго време се во спор околу европската регулатива за големите дигитални платформи.
