Американскиот претседател Доналд Трамп ѝ се закани на Европската унија со „значајни“ царини, откако Брисел изрече високи казни за американски технолошки компании.
Во објава на својата платформа „Truth Social“, Трамп порача дека САД нема да дозволат да бидат третирани како „европска каса-прасе“.
„Соединетите Американски Држави не се европска каса-прасе и нема да дозволиме да станат тоа“, напиша Трамп.
Неговата реакција следува неколку дена откако компанијата „Гугл“ беше казнета со 890 милиони евра, откако Европската унија утврди дека нејзините услуги за пребарување и продавницата за апликации ги прекршиле правилата за конкуренција во дигиталниот сектор.
Трамп најави дека САД „веднаш“ ќе започнат истрага за, како што наведе, практиките на „ограбување“ на американските компании, а со тоа и на американските даночни обврзници.
„Европската унија ќе плати многу висока цена за ова незаконско и крајно неетичко однесување, на кое повеќепати сум ги предупредувал“, изјави Трамп.
Претходно, американскиот претседател упати предупредувања и кон Кина и Русија, посочувајќи дека би било „многу лошо“ доколку некоја од овие земји испорачува оружје на Иран.
Трамп изјави дека кинескиот претседател Си Џинпинг го уверил дека Кина нема да испорачува или продава оружје на Исламската Република Иран, вклучително и преку кинески компании.
Тој додаде дека и рускиот претседател Владимир Путин му дал слични уверувања, и покрај војната во Украина.
„Ако се вмешаат, тоа би било многу лошо за нив – секако не е во нивен интерес“, порача Трамп.
