Американскиот претседател Доналд Трамп ѝ упати остра предупредувачка порака на Франција, заканувајќи се со воведување царини од 100 проценти за француските вина и шампањи доколку Париз не го укине данокот од 3 проценти за дигиталните услуги што ги плаќаат големите технолошки компании.
Заканата доаѓа непосредно пред почетокот на овогодишниот самит на Г7 во Евјан-ле-Бен, Франција.
„Го замолив претседателот Емануел Макрон да не им наплаќа на американските компании. Ако продолжат со тоа, немам друг избор освен да воведам 100 проценти царина за сите шампањи и сите вина што доаѓаат од Франција“, изјавил Трамп за „Њујорк пост“.
Францускиот данок на дигитални услуги, усвоен во 2019 година, предвидува оданочување од 3 проценти на бруто-приходите што во Франција ги остваруваат големите технолошки компании, меѓу кои американските гиганти „Амазон“, „Мета“ и „Алфабет“.
Според достапните податоци, извозот во САД сочинува околу една петтина од вкупната глобална продажба на француската винска индустрија, што изнесува приближно две милијарди долари годишно.
Ова не е првпат администрацијата на Трамп да ја става француската винска индустрија во центарот на трговските спорови. Уште во 2019 година Вашингтон се закани со високи царини како одговор на воведувањето на дигиталниот данок, оценувајќи дека мерката е дискриминаторска кон американските компании.
Во јануари годинава, Трамп најави можност и за воведување царини од 200 проценти за француските вина и шампањи, во обид да изврши дополнителен притисок врз францускиот претседател Емануел Макрон.
Новата закана дополнително ги зголемува тензиите меѓу Вашингтон и Париз и отвора можност за нов трговски судир меѓу двете сојузнички држави.
