Трамп започна со депортациите во Либерија, пристигнаа првите 20 лица

Првата група од 20 лица, депортирани од САД, пристигна во Либерија, како дел од новиот договор според кој оваа западноафриканска земја треба да прифати до 1.200 мигранти депортирани од Соединетите Американски Држави.

— реклама —

Авионот со депортираните слетал во четврток на меѓународниот аеродром „Робертс“, во близина на главниот град Монровија. Според либериските власти, меѓу вкупно 1.200 лица што треба да бидат испратени во земјата ќе има државјани од различни африкански земји, но и лица од Северна и Јужна Америка и од Карибите.

— реклама —

Договорот меѓу Либерија и САД е еден од најголемите договори за депортација во трети земји што ги спроведува администрацијата на американскиот претседател Доналд Трамп во рамките на политиката за сузбивање на илегалната миграција.

— реклама —

Либерискиот министер за правда Нату Освалд Тве изјави дека повеќето од депортираните направиле прекршоци поврзани со миграциските правила. Тој посочи дека лицата што ќе пристигнат во Либерија ќе имаат можност да побараат азил доколку тоа го сакаат.

Договорот, сепак, наиде на критики од организации за човекови права. Активистите тврдат дека американската администрација преку вакви договори испраќа луѓе во земји кои не се нивни матични држави, а адвокатите за имиграциско право предупредуваат дека на тој начин може да се создаде правна празнина и дополнително да се отежни заштитата на барателите на азил.