Трамп заработил повеќе од милијарда долари од криптовалути за една година

Американскиот претседател Доналд Трамп во текот на минатата година остварил приходи од над една милијарда долари поврзани со криптовалути, покажуваат податоците од неговиот финансиски извештај, како и информациите за неговите активности во криптосекторот.

— реклама —

Според извештајот, Трамп пријавил 635 милиони долари авторски надоместоци од компанијата што го издава криптотокенот $TRUMP, кој беше лансиран три дена пред неговото стапување на должност за вториот претседателски мандат.

Дополнително, тој пријавил повеќе од 500 милиони долари приходи од продажба на токени на компанијата World Liberty Financial, проект за криптовалути што го поддржуваат Трамп и неговото семејство. Од продажба на удели во компанијата што ја контролира оваа платформа инкасирал уште околу 65 милиони долари.

— реклама —

Преку берзански трансакции, Трамп заработил и околу 196 милиони долари од продажба на акции на компанијата Stablecoin Holdco LLC.

— реклама —

Компанијата World Liberty Financial е основана за време на претседателската изборна кампања во 2024 година. Нејзини коосновачи се Доналд Трамп, неговите синови Ерик и Доналд Трамп Помладиот, како и Зак и Алекс Виткоф, синови на специјалниот пратеник на САД за решавање конфликти и долгогодишен соработник на Трамп, Стив Виткоф.

Приходите од криптовалутите значително ги надминале неговите заработки од традиционалниот бизнис со недвижности. Така, од клубот „Мар-а-Лаго“ остварил околу 77 милиони долари, од голф-клубот во Дорал, Флорида, 122 милиони долари, а повеќе од 30 милиони долари приход оствариле и неговите голф-клубови во Јупитер, Бедминстер и Тарнбери.

— реклама —

Во финансискиот извештај се наведува дека Трамп пријавил и 4,7 милиони долари авторски надоместоци од продажба на часовници со неговото име, како и приходи од патики, парфеми и гитари со брендот „Трамп“. Дополнително, компанијата „Трамп Ресторани“, со седиште во Њујорк, остварила речиси 2,9 милиони долари приходи од продажба на храна и пијалаци.