ВМРО-ДПМНЕ преку соопштение реагираше на прес-конференцијата на пратеничката и потпретседателка на СДСМ, Јована Тренчевска, оценувајќи дека токму во периодот кога СДС беше на власт граѓаните се соочувале со висока инфлација и намалена куповна моќ.
Од владејачката партија посочуваат дека по седум години владеење на СДС, граѓаните биле доведени, како што наведуваат, „на работ на егзистенција“, додавајќи дека актуелната Влада спроведува политики кои даваат конкретни резултати.
„Владата, и покрај наследената празна државна каса од СДС и последиците од глобалната криза, спроведува политики кои даваат конкретни резултати“, се наведува во реакцијата.
Од ВМРО-ДПМНЕ истакнуваат дека просечната нето-плата од 2024 година до денес е зголемена за близу 8.000 денари, односно за 19,6 проценти, додека, според нив, инфлацијата е стабилизирана.
Во соопштението се наведува и дека се зголемени пензиите, како и платите на здравствените работници, просветните работници, припадниците на полицијата и одбраната.
Според ВМРО-ДПМНЕ, стапката на невработеност е намалена од 12,5 на 11,3 проценти, додека стапката на вработеност е зголемена од 45,6 на 46,5 проценти.
Од партијата посочуваат дека Македонија бележи раст на бруто-домашниот производ од три проценти во седум последователни квартали и дека земјата се вбројува меѓу побрзорастечките економии во Европа.
„Овие резултати покажуваат дека економските политики на Владата носат конкретни придобивки за граѓаните и создаваат основа за натамошно подобрување на животниот стандард“, наведуваат од ВМРО-ДПМНЕ.
