Во последните 24 часа полицијата регистрирала вкупно седум случаи на семејно насилство низ државата, при што три лица биле лишени од слобода, а со едно лице бил извршен службен разговор.
Најтежок случај бил пријавен во Скопје, каде на подрачјето на Центар бил уапсен 30-годишниот Г.К., откако физички ја нападнал својата мајка и употребил тврд предмет.
Во друг случај во скопско, 27-годишна жена пријавила дека нејзиниот сопруг физички ги нападнал неа и нивниот малолетен син, при што исто така употребил тврд предмет.
Полициски службеници извршиле службен разговор и со 49-годишен скопјанец, кој бил пријавен дека физички ја нападнал својата малолетна ќерка.
Во Охрид бил лишен од слобода 33-годишен маж, откако неговата сопруга пријавила дека по расправија се обидел да ја нападне со остар предмет и ѝ упатувал закани.
Во Берово, 43-годишна жена пријавила дека нејзиниот сопруг ја нападнал со метален предмет по семејна расправија.
Во Тетово бил уапсен 37-годишен маж по пријава од неговата поранешна партнерка дека ја следел, вознемирувал, насилно влегол во нејзиното возило и ѝ го одзел мобилниот телефон.
Во Велес, пак, 75-годишна жена пријавила дека била физички нападната од својот 78-годишен сопруг, кој употребил пластичен и дрвен предмет.
Од Министерството за внатрешни работи информираат дека се преземаат мерки за целосно расчистување на сите случаи и дека по нивното документирање ќе бидат поднесени соодветни кривични и прекршочни пријави.
