Три пожари и натаму активни, огнот кај Чаниште се движи кон Зовиќ и Крушевица

Во текот на изминатото деноноќие во земјава се регистрирани вкупно 37 пожари на отворен простор, од кои три и натаму се активни, еден е ставен под контрола, а 33 се целосно изгаснати, информира Центарот за управување со кризи.

Според информациите до 7:30 часот утрово, активни пожари има на подрачјето на општините Студеничани, Македонски Брод и Прилеп.

— реклама —

Во Студеничани, пожарот се шири на потегот од селото Моране кон Вртекица и Рамни Габер, при што гори мешана шума.

Активен е и пожарот во општина Македонски Брод, на месноста Видуш, кај селото Драгов Дол и кај Локвица. Таму е зафатена ниска вегетација, нискостеблеста шума и грмушки.

— реклама —

Најдолгогодишниот пожар на подрачјето на Прилеп и натаму е активен. Огнот кај селото Чаниште се движи во два правци – едниот крак кон селото Зовиќ, а другиот кон Крушевица. Зафатена е ниска вегетација.

— реклама —

Пожарот во Делчево, каде што гореше депонија, е ставен под контрола.

Во изминатото деноноќие целосно се изгаснати уште 33 пожари на територијата на повеќе општини низ земјава. Дел од нив биле на ниска вегетација, сува трева и грмушки, додека други избиле на диви и комунални депонии.

— реклама —

Меѓу општините каде што се регистрирани изгаснати пожари се Ѓорче Петров, Сарај, Аеродром, Арачиново, Могила, Новаци, Долнени, Радовиш, Струмица, Велес, Зелениково, Чашка, Кичево, Штип, Виница, Кочани, Липково, Кратово, Старо Нагоричане, Ранковце, Брвеница, Тетово, Јегуновце и Гостивар.

ЦУК продолжува да ја следи состојбата на терен и ги координира активностите со надлежните институции и локалните служби.