Спасувачките екипи во Непал продолжуваат со интензивната потрага по стотици исчезнати лица по разорните поплави и поројните надојдени води што го погодија регионот на 26 август. Особено тешка е потрагата по работниците за кои се стравува дека останале заробени во тунели на хидроцентрали.
Во спасувачката акција се користат и дронови со термални камери. Пилотот на дронови Маниш Махарџан се приклучил на непалската армија еден ден по катастрофата, со задача да помогне во пронаоѓањето на околу 900 исчезнати работници од 12 градилишта на хидроцентрали. За околу 500 од нив се верува дека се заробени во тунели.
Дроновите досега помогнале во пронаоѓање луѓе кои останале отсечени на падини и во пештери. Спасувачите користеле и звучници со микрофони за да ги повикаат луѓето, а на некои места пуштале и музика за да добијат одговор. Во неколку случаи, овој метод помогнал да се лоцираат преживеани.
Сепак, потрагата во тунелите е многу потешка.
„Тунелите беа исполнети со кал, како паста за заби во туба“, изјави Махарџан, додавајќи дека во некои од нив немало ниту празен простор во кој би можеле да се наоѓаат преживеани.
Катастрофалните поплави започнаа по одрон и уривање на глечер во Хималаите. Одронот бил толку силен што бил регистриран како сеизмички настан со магнитуда од 5,2 степени. Водата, калта и карпите потоа се спуштиле кон долините во Тибет и Непал, предизвикувајќи огромна штета на хидроцентрали, патишта, мостови и објекти.
Дополнителен проблем е времето. Експертите предупредуваат дека првите 72 часа се клучни за преживување на луѓето кои се заробени без пристап до чиста вода и воздух.
Според Махарџан, дроновите се особено ефикасни во долги и прави тунели, додека свиоците и сложените премини значително ја отежнуваат потрагата.
Во Непал и Кина во поплавите досега загинаа повеќе од 1.000 луѓе, додека илјадници лица и натаму се водат како исчезнати.
