Тројца мотоциклисти биле лишени од слобода во одвоени полициски акции во Прилеп и Маврово, откако биле затекнати како управуваат мотоцикли без возачка дозвола, а во еден случај и со нерегистрирано возило.
Како што информира Министерството за внатрешни работи, на 26 јули во 11:00 часот на булеварот „Гоце Делчев“ во Прилеп бил приведен Б.С. (35) од Прилеп. При сообраќајна контрола било утврдено дека управувал мотоцикл со прилепски регистарски ознаки без возачка дозвола.
Истата вечер, односно на 27 јули во 00:05 часот, на улицата „Кузман Јосифоски“ во Прилеп бил лишен од слобода и М.Б. (39) од Прилеп, кој управувал мотоцикл со скопски регистарски ознаки, исто така без возачка дозвола.
Во трет случај, на 26 јули во 13:10 часот во Маврови Анови, полициски службеници го привеле Е.С. (18) од Гостивар. При контролата било утврдено дека управувал нерегистриран мотоцикл без возачка дозвола. Мотоциклот му бил одземен.
По целосното документирање на сите случаи, против тројцата ќе бидат поднесени соодветни пријави.
