Трошоците за живот за една година пораснале за 3,4 отсто

Трошоците за живот во јуни годинава се зголемиле за 3,4 проценти во споредба со истиот месец лани, додека цените на мало бележат годишен раст од 3,6 проценти, покажуваат најновите податоци на Државниот завод за статистика (ДЗС).

Според извештајот, месечната инфлација во јуни, мерена преку индексот на трошоците на животот, изнесува 0,5 проценти во однос на мај.

— реклама —

На годишно ниво, најголем раст на цените е регистриран кај алкохолните пијалаци и тутунот, кои се поскапи за 9,3 проценти. Следува секторот транспорт со пораст од 6,2 проценти.

Храната и безалкохолните пијалаци за една година поскапеа за 2,5 проценти, а исто толку раст е забележан и кај домувањето, водоснабдувањето, електричната енергија, комуникациите и информациите.

— реклама —

Цените за покуќнина, опрема и одржување на домаќинствата се зголемиле за 4,2 проценти, услугите во образованието за 4,6 проценти, а рестораните и сместувањето за 4,9 проценти.

— реклама —

На месечно ниво, најголем раст е забележан кај рекреацијата, спортот и културата – 1,4 проценти.

Во однос на мај, поевтинување има кај храната и безалкохолните пијалаци за 1,1 процент и кај транспортот за 1,6 проценти.

ДЗС објави и дека индексот на цените на мало во јуни е намален за 0,8 проценти во споредба со претходниот месец, додека на годишно ниво е повисок за 3,6 проценти.

Најголемо месечно намалување на цените е забележано кај земјоделските производи, кои поевтинија за 6,2 проценти, додека прехранбените производи се поевтинија за 1,5 проценти.