Управата за финансиска полиција поднесе кривична пријава до Основното јавно обвинителство Скопје против две физички лица и едно правно лице поради сомнение за сторено кривично дело „даночно затајување“.
Според соопштението, првопријавениот Н.О., државјанин на Турција и реален сопственик и управител на компанијата во периодот од 2016 до 2021 година, заедно со второпријавениот Е.М., кој подоцна бил запишан како сопственик и управител, се сомничат дека со однапред утврдена намера избегнале плаќање на даночни обврски и противправно присвоиле трговска стока.
Финансиската полиција наведува дека компанијата не изготвила и не поднела завршни сметки за 2022, 2023, 2024 и 2025 година, при што трговска стока во вредност од 32.054.759 денари била неосновано присвоена.
Воедно, според наводите, не бил пресметан, пријавен и уплатен данок на додадена вредност во износ од 5.769.856 денари, како и данок на личен доход во висина од 3.561.283 денари.
Дополнително, пријавените не ги отпишале застарените краткорочни обврски кон добавувачи постари од три години, во износ од 32.847.325 денари, ниту ги прикажале како приходи, поради што не бил пресметан и уплатен данок на добивка од 3.284.732 денари.
Со овие дејствија, според Управата за финансиска полиција, пријавените не пресметале, не пријавиле и не уплатиле законски утврдени даночни обврски во вкупен износ од 12.615.871 денари, со што го оштетиле Буџетот на Република Македонија.
