Борбата против корупцијата ќе биде еден од клучните столбови на програмата „Твоја држава – твоја шанса“, порача денеска Александар Наумоски, член на Извршниот одбор на СДСМ, презентирајќи пакет мерки за реформирање на правосудниот систем и зголемување на одговорноста на носителите на јавни функции.
Наумоски оцени дека корупцијата е присутна во сите сфери на општеството, додека правдата, според него, е селективна и под влијание на политичките центри на моќ.
„Граѓаните не веруваат во правосудниот систем затоа што систем нема. Затоа борбата против корупцијата е во срцето на нашата програма“, истакна тој.
СДСМ предлага донесување нов Антикорупциски закон, формирање посебно независно тело за борба против корупцијата и воведување дигитални механизми за следење на трошењето на јавните пари.
Партијата најавува и ветинг за сите избрани и именувани функционери од 90-тите години до денес, при што секој ќе треба да го докаже потеклото на својот имот и начинот на кој го стекнал. Дополнително, се предлага итна конфискација на нелегално стекнатото богатство и укинување на имунитетите на функционерите.
„Никој нема да биде над законот“, порача Наумоски.
Во пакетот мерки е предвиден и ветинг на судии и обвинители, воспоставување јавен регистар на вистинските сопственици на компании, како и директна и оперативна соработка со Европското јавно обвинителство со цел откривање и спречување корупција на највисоко ниво.
Од СДСМ велат дека секоја пријава за корупција треба да биде темелно истражена преку автоматски механизми за проверка и засилен институционален надзор.
„Правдата не е привилегија. Таа е право на секој граѓанин“, порача Наумоски.
