Педесет и осумгодишен жител на гостиварското село Равен е лишен од слобода откако при претрес во неговиот дом и помошните простории биле пронајдени дрога и муниција, соопшти Министерството за внатрешни работи.
Полициски службеници од ОВР Гостивар денеска околу 07:30 часот го привеле Д.С. (58), поради сомнение дека сторил кривично дело „неовластено производство и пуштање во промет на наркотични дроги, психотропни супстанции и прекурсори“.
При претресот, извршен врз основа на судска наредба, биле пронајдени и одземени бела прашкаста материја, марихуана и куршуми за пиштол.
Осомничениот е задржан во полициска станица, а по целосното документирање на случајот против него ќе биде поднесена соодветна кривична пријава.
