Во Флорида денеска започнува судењето на 38-годишниот Марио Фернандез Салдана, обвинет дека учествувал во организирањето на убиството на 33-годишниот менаџер во „Мајкрософт“, Џаред Бридеган.
Бридеган беше убиен во февруари 2022 година во Џексонвил Бич, откако со автомобил застанал на патот поради гума намерно оставена на коловозот. Според обвинението, напаѓачот потоа повеќепати пукал во него, додека неговото двегодишно дете било врзано во детското седиште во автомобилот.
Обвинителството тврди дека станувало збор за нарачано убиство во кое биле вмешани поранешната сопруга на Бридеган, Шана Гарднер, и нејзиниот сегашен сопруг Фернандез Салдана.
Фернандез Салдана е обвинет за убиство од прв степен, а судењето се одржува во округот Дувал. Гарднер, исто така, е обвинета за убиство, но нејзиното судење е закажано за септември.
Бридеган и Гарднер се развеле во 2015 година, по што имале долгогодишен спор околу старателството над нивните две деца. Според полициските наводи, конфликтот меѓу поранешните сопружници бил еден од мотивите за убиството.
Како непосреден извршител на убиството е посочен Хенри Тенон, кој во 2023 година ја признал вината за убиство од втор степен и се согласил да сведочи против Фернандез Салдана. Сепак, на почетокот на оваа година тој го повлекол признанието и сега треба одделно да му се суди во 2027 година.
Истрагата покажала дека на гумата оставена на патот бил пронајден ДНК-материјал на Тенон. Обвинителството тврди и дека Гарднер и Фернандез Салдана му исплатиле најмалку 10.000 долари по убиството.
Бридеган бил нападнат откако ги однел своите деветгодишни близнаци кај Гарднер, по нивниот вообичаен заеднички излез. Потоа тргнал кон својот дом во Сент Августин со едно од двете деца што ги имал со сопругата Кирстен, со која се венчал во 2017 година.
Пред да започне кариера во „Мајкрософт“, Бридеган бил директор за технологија во компанијата „Clean Simple Eats“.
